Am Flughafe hani scho s erste Highlight gseh...min eigene Schläckzüglade! woooow!
und wie sölls au anderst si, isch au das Hostel weder grad direkt näbeme Viertel wo mr ned sött dure laufe! das isch jo de Gipfel..de ade Reception hets au ned so lässig gfunde. Für mich spielt das aber gar kei Rolle, will alli Touristeattraktione ufere ganz andere Site sind!
Leider ben ich höt viel spöter als plant ufgstande...erst am halbi 10i, aber was sölls ich han jo schliesslich au Ferie!!! Denn han ich mir höt es Bike gmietet und bin losgfahre krüz und quer und um San Francisco ume....
Zerst am Hafe verbi...Pier Nr. 32 oder so
Americas Cup LIVE!!!
und zuefälligerwis hani sogar no s Winner Schiff gfötelet. Hani denn aber au erst uf de Bluewin Site gläse höt Obe! :-)
Do gseht mr die beide Boot in Aktion (links vom orangige Drüeck)
und überall, also wörklich überall rund um de Hafe hets Lüt gha wo gluegt händ. Übers Natel händs de Radiobericht vom Rennverlauf gloset und händ mitem Feldstächer mitgfieberet.
das hani also au nonie gseh...die sind nur do ufegfahre zum das luege.
Am Pier 39 hani mi ned so lang ufghalte, s Tagesprogramm isch sehr kompakt gsi för höt.:-)
und no en chline Usblick uf morn...
ALCATRAZ!! (freu, freu, freu)
und witer im Pier entlang, verbi bide Fisherman's Wharft
em Strand entlang. D Bridge chont zum Glück immer nöcher.
und voila...das isch sie jetzt also. d Golden Gate Bridge vo San Francisco.
Händ ihr au immer das Lied im Ohr...Going to San Fran-cisco....und so witer....danke ich ebe au und es got nüm weg!!!
Blick zrugg nach San Francisco
Links im Bild isch weder Alcatraz
Also höt zu Tags wärs keis Problem meh zum flüchte vo dört...bi dene vielne Boot do im Hafe nimmt di sicher eine usem Wasser. ;-)
Über Brugg und ufe uf de Hügel...schoweder en Hügel. Das isch unvorstellbar wie oft mr do am Tag ufe und abe fahrt mitem Bike zum durch die Stadt cho!!! und de vode Velovermietig het gseit es sig flach do!!! Hallo???? Ich glaub de isch nonie in Wawota gsi....dört isches flach! :-)
und scho beni weder ufem Rückwäg...und so motiviert wieni bin fahr ich natürlich mitem Velo über Brugg zrugg und ned mit de Fähri wie alli andere woni troffe han...
wenn sich das nur ned no als Fehler usestellt???
ES ISCH DEFINITIV EN FEHLER GSI!!! oh mein Gott ich glaub ich wird morn soooo Muskelkater ha wie nonie i mim Läbe. Nach de Brugg hani mi verfahre. Ufe und weder abe und das ganze weder zrugg. Denn weder ufe...und ich mag doch gar nüm...und denn nomol ufe und weder abe und denn stetig berg uf dur es wunderschöns Wohnquartier und denn ufe zum Legion of Honor Museum damit ich denn hinde wieder han chöne abe fahre...ah jo und 42 Treppestufe hani mis Velo denn au no abretreit, bis ich endlich bim Restaurant gsi bin, woni ane han wölle!!! Phuuu....
deför de Usblick...
Wunderschön...Land's End!
(isch wörkli chli am A... vode Wält) ;-)
Denn beni durch de Golden Gate Park zrugg gradlet, wie ihr euch jo sicher chöned vorstelle ischs au do ned eifach grad us gange, aber ich has denn doch au no gschafft. Quer durch d Stadt zrugg zum Veloverleih! und das alles für 20 Dollar und ich läb no! :-)
ufem Fuesswäg zrugg is Hostel isch mir denn no das begegnet.
Het mich grad an die TV Serie "Chips" erinneret! De hammer...
so und jetzt bin ich total uf de Schn..... und gang go legge!
denn morn gots do undedra witer mit Alcatraz....
TAG 2 in SAN FRANCISCO
Höt beni wörklich nach Alcatraz. Mini Cable Car Fahrt hani aber uf nachher müesse verschiebe, 2 Stund astoh hani ned igrächnet gha. Also beni wedermol gloffe...de Berg ufe und äne weder abe! Quer durch Chinatown...abe zum Pier 33 und 2 Kilometer use mitem Boot nach Alcatraz!
do ufe hani zum Glück ned über die Treppe müesse laufe, aber de Weg isch ned weniger steil gsi.
Die 4 Häftling händ mich bide Audiotour begleitet und händ verzellt was sie do im Gfängnis erläbt händ.
En normali Gfängniszelle. 1,5 Meter breit und 2,7 Meter tief und höch! Genauer gseit en chlini Kiste!
Drinne gha hets nur en chline Tisch, en Stuhl, en WC Schüssle und ev. 2 Brett als Ablageflächi und en Pritsche zum schlofe.
Das isch die einzige Uhr gsi im ganze Gfängnistrakt unterhalb vom Schiessgang. D Wärter sind nur in dene beide Gäng obe wos Gitter gha het bewaffnet gsi.
Do händ d Häftling dörfe 3 Stond pro Tag use an di frisch Luft. Sie sege ame fast verfrohre, wills do uf de Insle so fest gwindet het, aber es isch glich no besser gsi als in de Zelle hocke.
Die Zelle isch für die in Einzelhaft...moderner, aber die kältiste im ganze Gfängnis.
Und do d Zelle 9 - 15 oder so...sind die für di ganz schlimme gsi. Do hets gar nüt dinne gha und meistens händs au kei Licht gha. Eine vode Häftling het sich ame en Knopf vom Hemd abrisse, het de im dunkle ufgworfe, sich um sich selber treit und denn am Bode de Knopf gsuecht. So als Beschäftigung....
An dem Hake händ d Wärter ame ihre Schlüssel in Sicherheit brocht, damit sie ned bestohle worde sind. Doch eimol hets eine gschafft an die Schlüssel anezcho...er het wölle mit 5 andere usbreche.
Das ganze het aber imene Kampf gändet mit Granateagriff vode Marine...dodebi sind die Delle entstande.
Spöter händs denn möblierti Zelle chöne ha und händ ghöglet, musiziert oder Bilder gmalt.
De Lüchtturm vo Alcatraz....sehr wichtig bi all dem Nebel wos do immer het.
und do unde...ich nimms zumindest a...het er gstande! De Nicolas Cage im Film "The Rock" woner mit de Fakle in de Händ ufd Knie gheit isch! :-)
Das wär no d Kuchi! Gässe händs nie schlecht uf Alcatraz...das isch en wichtige Punkt gsi, damit d Häftling au agnehm gsi sind.
En letschte Blick zrugg...ich bin froh chani weder go...zrugg an Pier 39!
Jetzt isch endlich Essenszit....Bubba Gump Shrimps!
und denn hets doch no klappt mitem Cable Car fahre...
wies funktioniert? Kei Ahnig...ich has immernonig verstande. :-)
Egal hauptsach es isch ufegfahre und het denn bim abefahre weder bremst.
Wunderschön gsi do...und morn gots witer nach Los Angeles
8,5 Stund Bus fahre....
Keine Kommentare:
Kommentar veröffentlichen