Vegas Baby Vegas

Ich bin in Las Vegas ich chas fast ned glaube! Ich zum Greyhound use, abe zum nächste Bus, denn gfahre bis zur Station Excallibur und denn beni dört uf de Stross gstande und han mich kurz en moment gfrogt, wie öberhaupt mis Hotel usgseht!!! ???

Anderst als erwartet uf jedefall…

Ok denn mal ine is Märlischloss und ab in Tower 1 zu mim Zimmer! So schön weder mol eigeni 4 Wänd z ha ohni dass immer öper ine oder uselauft mitts in de Nacht!

Denn hani mol bi Tag en Tour durch Vegas gmacht…übere zum Luxor…

D Stross abe bis zum Belaggio (Leider ned in mim Budget gsi!)

 

Nachem esse beni denn nomol de Las Vegas Boulevard abe gloffe bis zum Venezia. Föteli do, Föteli dört…unglaublich wieviel liechter do sind und öberall hets Lüt und Musig…

 

Unglaublich aber wohr…au do hets es Hard Rock Cafi :-)

 

D Wasserschow bim Belaggio hani 2x gluegt…wunderschön! (Das im Vordergrund isch en grössere bewegliche Springbrunne!)

TAG 2 LAS VEGAS

Für de nöchsti Tag hani mir es Auto gmietet…so en chline Ford Fiesta hani dänkt. Für de Mustag oder de Dodge het mis Budget weder ned glängt! :-(
Es isch denn wedermol es grössers Auto gsi, aber sehr pflegeliecht! (Sandro ich chome langsam uf de Gschmack mit dene grosse Autos! ;-) )

Am morge am 9i beni losgfahre zum Hoover Dam.

 

Uf die Brugg ufe hätt mr chöne laufe und vo obe es Föteli mache. Ich han leider d Abzwiegig verpasst…

Quer durchs Land so zäge.

Die Dame vom Touristecenter het gmeint de Skywalk sig ned soo spektakulär, wenn mr Zit heg söll mr besser zum South Rim fahre…das isch allerdings 4,5 Stond entfernt…jetzt isch rechne agseit…mitlerwile isch bald 10i gsi…plus 4,5 Stund…das wird öppe 3 am Nomitag! Denn chli dört si, spötistens am 5i weder abfahre, denn beni so am 10i retour! Das passt!

South Rim ich chome!!!

Es het sich glohnt! Es isch de absoluti Hammer gsi! Sehr sehr idrücklich…

D Rückfahrt isch denn bis Kingman chli sehr astrengend gsi, will ich chli müed gsi bin und d Sonne grad so en blöde Stand gha het, will sie am untergo gsi isch! De 2. Zwöschehalt bim Hoover Dam uf de Brugg isch denn au is „dunkle" gheit. Tja nu…

Egal…ich has gschafft und bin denn no frühner als erwartet am 9i schoweder zrugg in Vegas im Parkhuus vom Hotel gsi.

Fazit: 12 Stund unterwegs, devo 10,5 Stund Autofahre, 2 Liter Wasser trunke, 1 Big Mac gässe und KEIN Sonnebrand gholt! = En fast perfekte Tag!
(de Reste hani schoweder vergässe)

und morn?? ja morn gots nach San Diego für en Nacht und en halbe Tag und denn retour nach L.A. für en halbe Tag...wird wohl nochli Shopping geh! ;-)