Montreal

So endlich hani mol Zit zum euch chli schriebe! ;-)
Es git sooo viel zum entdecke. Old Montreal mitem Hafe isch en Traum...es verträumts Quartier mit Häuser wie no vor Jahrzite.

 

 

 

Au d Nottre Dame do in Montreal isch wunderschön und sehr beeidruckend!

Nei, das isch keis Foti vonere Postkarte!!! Isch sälber gmacht. :-)

 

Nachere chline Busfahrt uf de Hügel oberhalb vo Montreal undeme Spaziergang vo öpe 15 Minute hämer die herrlichi Ussicht ufd Stadt chöne gniesse. Do sind mir gärn mol es paar Minute aneghöcklet und händs eifach chöne gniesse.

 

Leider hets Wätter ned immer ganz mitgmacht, aber gege die fiese Rägetropfe hämer eus chöne wehre und händ je en Schirm für 2 Dollar kauft...en super Investition. ;-)

 

So ischs denn weder zrugg id Stadt gange...über rund 200 Treppestufe...zum Glück sind mir do ned ufegloffe!

Am Obe sind mir uf Ille of Helene gange is Casino go z Nachtässe und d Ussicht ufd Stadt z gnüsse.
Verzockt hämer nüt...mir sind vom viele laufe sooo müed gsi, das wär eh ned guet usecho.

Im Vordergrund Old Montreal und hinde zue d Wolkekratzer.

Olympia Park usem Johr 1976 - Olympische Sommerspiele

 

Do hämer eifach bim verbi go vo usse es paar Föteli gmacht....und natürlich d Schwizerfahne gsuecht. (2. Reihe, öpe die 5 letscht oder so)

Und denn sind mir witer in Botanische Garte...so öpis genials hämer glaub no nie gseh. Das isch eine vode schönste und idrücklichste Gärte wo mir scho je gseh händ!!!

 

und errate? - genau Madagaskar

 

Die Figure bestönd alli us Blueme bzw. Pflanze....ja alles!

 

 

So faszinierend...wenn mir no witer hätte möge laufe, wäre mir no länger do bliebe, aber eusi Füess händ langsam nüm möge...und mir händ jo no müesse s Auto abhole und losfahre in Richtig Ottawa...

do dezue gits denn spöter mehr...

hope you enjoyed and cya soon