Die zwei Stund ufem Schiff hämer total relaxt überstande, obwohl um eus ume einiges los gsi isch. 2 bissigi Hünd, en Frau wo gstürzt isch und en Führwehrma mitere Sauerstofffläsche. Egal...hauptsach s Schiff isch in Tobermory acho und mir händ weder chöne abefahre.
Tobermory isch es schöns Hafestädtli vo wo us mr chan chlineri und grösseri Schiffstoure mache.
Eigentlich hämer dänkt mir bliebe nach dere Fähri chli an Land, aber so spontan wie mir sind, hämer am 20 vor 12i entschede, dass mir am 12i no ufem Boatstour gönd. Ich bin go 2 Sandwich und 2 Wasser kaufe, während d Andrea nomol zum Auto grennt isch go d Sonnebrille hole! ;-)
Pünktlich zrugg sind mir mitem Boot usegfahre, zerst no über es versunknigs Schiffswrack und denn um en chlini Insle.
Unterwegs hämer sogar no en Wiiskopfadler gseh!
Nach rund 1,5 Stund sind mir zrugg gsi und sind mitem Auto in Richtig Niagarafäll losgfahre...reini Fahrtzit 3,5 Stund!
Am Obe am 8i sind mir endlich im Hostel acho. Check-In, Zimmerbezug, chli Deo, chli Frisur richte und ab Richtig Niagara Fäll. Die sind no sehr schön belüchtet bi Nacht.
Mit eusem riiiiiesige Glück wo mir händ, hämer no en günstige Parkplatz gfunde und näbedra im Touricenter grad no es Ticket für Bootstour zude Niagara Fäll und "Behind de Niagara Falls"...morn chont denn us, was das Ticket würklich wert isch!
Ah jo und mini Hardrock Cafe Shotgläsli Sammlig wird au vo Stadt zu Stadt grösser! :-)
Keine Kommentare:
Kommentar veröffentlichen