Niagara Falls am Tag und Toronto Downtown

Am Morge sind mir denn früh ufgstande, damit mir zitig bide Niagara Fäll gsi sind. Nach 10 Minute astoh und de definitive Itrittskarte isches zackig gange. Treppe abelaufe, s blaue Mänteli alege und ab ufs Schiff wo eus direkt zude Wasserfäll gfahre het.

 

Die amerikanisch Site...

 

 

und di kanadischi und natürlich schöneri! ;-)

 

 

Denn hämer no chöne hinter de Wasserfall luege...und sind eifach nur no mehr nass worde!

 

Vo dene Tunnels hets 2 Fenster gha, wo mr direkt hinterem Wasser gsi isch. Gseh het mr zwar nüt ussert Wiis, aber lut ischs gsi. Es richtigs donnere...

 

 

au kei Wunder wenn do pro Minute 154 Mio. Liter Wasser abefliesse!
(Im Winter sinds nur 86 Mio. Liter pro Minute)

 

Vo obe het denn das ganze au no sehr schön usgseh!

 

 

und sogar d Sonne het zwöschedure mol usegluegt. Leider hets bi so viel Wasser halt au sehr viel Dunst und Nebel! :-(

 

 

Drum het au de 3 Wettertaft do nüt meh gnützt...Frisur ade! :-)

 

 

 

Nach dem viele Wasser hämer eus uf de Wäg gmacht nach Downtown Toronto. S letschte mol het eus de Garmin gseit wo mir müend durefahre...und mir händs sogar uf Ahieb mitere scharfe Linkskurve gfunde. Mitem Taxi simer denn zum Hostel gfahre und händ icheckt.

 

Im Zimmer hets eus aber ned lang ghalte und mir sind z Fuess quer durch d Stadt zum CN Tower.

 

 

 

und spontan wie mir sind, sind mir natürlich au grad no ufegfahre!

 

 

ja genau, das isch de berühmti Glasbode im CN Tower...342 m überem Bode! Brucht also schono recht Überwindig zum do druf z stoh...aber mir händs gschafft.

Lege isch au ned unbedingt agnehmer gsi...ab es gseht super us! Vorallem isch glaub bald jede um eus ume dört am Bode glege oder es isch dr no bald es Kind uf de Kopf gstande!

 

und das isch jo wohl s beste Foti!!!

 

 

Übrigens de höchsti Punkt vo CN Tower isch 553 Meter überem Boden!

 

 

bi Nacht...wunderschön belüchtet und je nach dem wo de Lift grad isch, ändert d Farb vom Streife vo unde nach obe. Das got recht schnell, will de Lift nur 58 Sekunde brucht bis zude erste Plattform...fahrt also mit rund 22 km/h ufe und abe!

 

Old Toronto

 

Bankenviertel

 

Und im Land vom Eishockey dörf natürlich d Hockey Hall of Fame ned fehle..die hani allerdings nur vo usse gseh...chli en tüüre Gspass.

 

 

Last but not least...Toronto Downtown

Blick vo Toronto Island...wunderschön, aber leider scho wolkig...

 

aktuell herrscht dusse grad en Thunderstorm...also eigentlich regnets nur und windet chli mehr als söscht! ;-)

D Andrea isch bereits dihei und wohl scho bald weder am schaffe und ich flüg morn witer nach Regina und fahr denn am 27. mitem Auto nach Wawota...raus auf die Farm. :-)